ازاى تتعاملى مع خطيبك او زوجك؟

لازم تعرفى ان فترة الخطوبة هى فترة مهمة جدا لانك من خلالها هتقدرى تعرفى الخطوط العريضة لطباع زوج المستقبل لأن فى طباع بتظهر بعد االزواج لأن الحياة طبعا بتختلف عن فترة الخطوبة .وطبعا الطباع الواضحة فى شخصية زوج المستقبل مش بتستخبى لفترة طويلة زى العصبية او الغيرة او الطباع الصعبة لا قدر الله زى الكذب والبخل عشان كده خلى المواقف الى بتحصل ما بينكم هى الى تخليكى تحكمى عليه ولا يمنع من انك تختلقى المواقف يعنى ما تخليش كل الكلام الى بيقوله خصوصا فى الاول هو العامل الاساسى للحكم عليه اذا كان هو ده الشخص الى هتقدرى تكملى معاه حياتك فعشان كده ماتحوليش تحددى موعد الزفاف الا اما تكونى فعلا حسيتى انك مرتاحة للشخص ده وقدرتى تفهميه كويس
ولازم تعرفى ان حياتك وراحتك هى اهم شئ وان اتخاذ اى قرار مصيرى يحتاج الى التفكير فيه كويس جدا

ثانيا :
ازاى تاخدى عينيه؟

اول حاجة لازم تعرفى ان اى راجل فى الدنيا ايا كان سنه وضعة الاجتماعى او طباعه فى الاخر هو طفل صغير بيبى جدددددددا محتاج منك الحنان والدلع "طبعا الدلع المحافظ" والكلام الحلو طبعا هتقوليلى هو مين فينا الى لازم يدلع انا ولاهو انا مخطوية عشان احس ان فى حد يحتوينى ويحبنى ويدلعنى يبقى انا الى هدلع؟
هسألك بمنتهى البساطة ؟ لو فيه طفل صغير ورخم كمان خد منك حاجة مثلا هتعملى ايه ؟ هتضربيه هيعيط ويلم عليكى الناس ومش هتاخدى حاجتك برده لكن لو كلمتيه براحة وجبتيلوه شكولاتة وطبطتى عليه هو الى هيرجعلك حاجتك بمنتهى البساطة
نفس الشئ مع خطيبك" مع احترامى انه يكون رخم يعنى"
الرجل بيحب دائما يكون المسيطر حابب يحس انه راجل ومهما كانت البنت او الست قوية الشخصية لازم تحسسه انها ضعيفة بمزاجك طبعا وانه هو كل حاجة ورايه مهم جدا بالنسبة ليها يعنى هقولك على موقف بنقع فيه كلنا انتى عايزه تخرجى مع صحابك وهو كالعادة بيرخم طبعا رغم انك مش بتتأخرى
انتى :وبطريقتلك العادية الصوت عالى والكلام حاسم خلاص وخاده القرار
بقولك ايه انا اتفقت مع اصحابى اننا هنخرج بكره
هو : الصوت برده عالى والشرار هيخرج من عينيه اتفقتى خلاص انتى بتقرررى كده من نفسك ولا اكن فى حد تستأذنيه هو انتى مخطوبة لايه طيب ما فيش خروج
وبكده انتهى اليوم بمشكله وخناقة لمدة ساعات طيب وليه ممكن الموضوع ياخد شكل تانى
انتى : نبرة الصوت هادئة جدا وبعد السؤال عن اخباره وشويه هزار ودردشة خفيفة
بقولك ايه يا كوكو يا توتو يا اى دلع المهم انا زهقانة اوى وكنت محتاجة انى اخرج شويه مع صحابى وانت مشغول الله يعنيك مش فاضى تخرجنى فيعنى بعد اذنك اخرج ومش هتأخر وبس واسكتى وما تستنيش الرد ممكن يرخم وما يردش او يقولك هفكر برده تسكتى وتتكلمى فى اى حاجة تانية وشوفى النتجية ان شاء الله تمام هو الى هيقولك روحى ومش بعيد كمان يوصلك الخلاصة انك تتطولى بالك وخلى كلامك حلو وحنينة هتخدى عينيه وخليها قاعدة فى حياتك حتى بعد الزواج وهتعيشى ان شاء الله حياة سعيدة

ثالثا :
خليكى مستمعة اكثر من انك تكونى متكلمة وده لسببين

اولا:تعرفى شخصيته وتكونى فكرتك عنه لانه طبيعى هو هيتكلم ويفتح الحوارات وخليه يكلمك عن نفسه وعائلته واصحابه وبكده تكونى عرفتى الحاجات الى هتخليكى تتعاملى معاه على اساسها .
طبعا هو يكون لحوح وعايزك تتكلمى بس انتى بقى قليلوه مكسوفه انا لسه مش متعوده عليك اكيد انتى فاهمنى

2 - صمت المرأة يزيد من جاذبيتها

لأن قلة كلامك وخاصة فى البداية يخليه مشدود ليكى طول الوقت ونفسه يعرف انتى بتفكرى فى ايه ومشاعرك نحوه ايه وكمان بيقلل كثير الملل الى بيحصل مع طول فترة الخطوبة لانكم هتلاقوا مواضيع كثيره اوى تتكلموا فيها وكلها هتيجى فى وقتها

رابعا :
* خلى دماغك كمبيوتر :

يعنى تخدى بالك من الحاجات الصغيرة الى سواء كان بيحبها عشان تعمليها او بيكرها تجنبيها ده بيحسسه اد ايه انه مهم بالنسبة ليكى
لازم تحفظى جميع التواريخ المهمة الى مرت عليكم من اول يوم قلك فيه انه بيحبك حتى يوم الزفاف وده لانها هتكون ذكرى حلوه اوى حتى بعد الزواج وتخلى فيه تجديد فى المشاعر على طول
يعنى مثلا اول خروجه مع بعض وفى نفس اليوم السنة الجاية ان شاءالله تعمليها مفاجأة وتحجزى نفس الترابيزة الى كنتم قاعدين عليها وفى نفس الميعاد ولو ينفع تلبسى نفس اللبس هتكون مفاجئة حلوه وتتبسطوا ان شاء الله

خامسا :
واهم حاجة احذرى ثم احذرى ثم احذرى

انك تحكى ليه كل شئ عن صحابك سواء المخطوبين او غير المخطوبين لان بعضهم بيربط مثلا ما بين المشاكل الى بتحصل مع صحابك وخطابهم وما بين مشاكلك معاه يعنى يقولك اصلك بتعملى زيك صحبتك
وبعضهم بيفتكر ان صحابك بيأثروا عليكى وبيملوا دماغك من ناحيته
وده بيخلى مشاكل كتييييير لا حصر لها
واهم شئ احساسك ان ليكى خصوصية مع صحابك احساس جميل

وخلى بالك اسرار صحابك منطقة محظورة ممنوع الاقتراب منها حتى لو ثقتك فيه لا حدود لها
ونفس الشئ مش كل حاجة تحصل مابينكم تحكيها لصحابك الا المقربيييييين

جداجدا وبردو مش كل حاجة لأن احيانا بننخدع فى ناس نفتكرهم اصدقاء ويكونوا فى الحقيقة اعداء
افتكرى ان نفسك اهم شئ فاتقى الله فيها واتقى الله فيه

» ازاى تخلى زوجك يحبك حتى بعد الولاد